काठमाडौंको तापक्रम अझै केही दिन शून्य डिग्री सेल्सियस कायम रहने

काठमाडौं : मौसमविद्हरूले काठमाडौं उपत्यकाको तापक्रम अझै केही दिन शून्य डिग्री सेल्सियस कायम रहने पूर्वानुमान गरेका छन् । उपत्यकाको तापक्रम सोमबार बिहानदेखि शून्य डिग्री सेल्सियसमा झरेको त्रिभुवन अन्तर्राष्ट्रिय विमानस्थलस्थित जल तथा मौसम पूर्वानुमान महाशाखाले जनाएको छ ।

चार दिनयता १ डिग्री सेल्सियमा रहेको तापक्रम घटेर सोमबार शून्य दशमलव ५ डिग्री सेल्सियसमा झरेको हो । सोमबार बिहान ५–९ बजे न्यूनतम तापक्रम शून्य आसपासमा झरेको मौसमविद् राजु प्रधानांगले बताए । सोमबारको तापक्रम यस वर्षकै सबैभन्दा न्यून भएको महाशाखाले जानकारी दियो । उनले तापक्रम अझै घट्न सक्ने बताए ।

गत वर्ष ३ दिन न्यूनतम तापक्रम शून्य थियो । पुस १५ देखि माघ १५ सम्म न्यूनतम तापक्रम यस्तै रहने महाशाखाको पूर्वानुमान छ । पश्चिमी वायुको प्रभावले तापक्रम निरन्तर घट्ने क्रम जारी रहनेछ ।

मंगलबार बेलुकादेखि मौसम फेरिनेछ भने बुधबार बदली भई केही ठाउँमा पानी पर्ने र उच्च भेगमा हिउँ पर्ने सम्भावना रहेको महाशाखाले जनाएको छ । तराईमा बिहान बाक्लो हुस्सु तथा कुहिरो लागे पनि दिउँसो मौसम सफा रहने र घाम लाग्ने अनुमान छ । सोमबार सबैभन्दा बढी चिसो जुम्लामा माइनस ५ डिग्री सेल्सियस रह्यो ।

मंगलबार दिउँसो देशभरि नै मौसम सामान्यतया सफा रहने र पहाडी भेगमा आंशिक बदली हुने सम्भावना रहेको महाशाखाको तीन दिनको पूर्वानुमानमा उल्लेख छ । पहाडी भेगमा सामान्य बदली भई विशेष गरी पश्चिमी पहाडी भूभागका एक÷दुई ठाउँमा हलुका वर्षा हुने सम्भावना रहेको महाशाखाले जनाएको छ ।

पश्चिमी उच्च हिमाली भूभागका एक÷दुई ठाउँमा हलुका हिमपात पनि हुने सम्भावना छ । बुधबार दिउँसो पश्चिमी तथा मध्य भेगमा सामान्य बदली भई पानी पर्ने सम्भावना छ ।

प्रतिक्रिया दिनुहोस्

error: Content is protected !!