दाङमा बम विस्फोट : म्यादी प्रहरीसहित नौ जना घाइते!

तुलसीपुर

दाङको तुलसीपुरमा बम विस्फोट हुँदा इलाका प्रहरी कार्यालय तुलसीपुरमा रहेका म्यादी प्रहरी विनोद चौधरीसहित नौ जना घाइते भएका छन्।

घाइते मध्ये चारजना गम्भीर छन्। गम्भीर घाइतेलाई थप उपचारका लागि नेपालगञ्ज रिफर गरिएको छ। अन्य पाँच जनाको राप्ती अञ्चल अस्पताल तुलसीपुरमा उपचार भइराखेको इलाका प्रहरी कार्यालय तुलसीपुरका प्रमुख सुधीरराज शाहीले जानकारी दिए।

विस्फोटबाट घाइते हुने दाङ तुलसीपुर उपमहानगरपालिका ७ डाँडापातु बस्ने २२ वर्षीया जेनि डिसी, बबई गाउँपालिका ६ पंचकुलेका वर्ष ३६ का नेपबहादुर खत्री, म्यादी प्रहरी उरहरीका २३ वर्षीय विनोद चौधरी, सल्यान बागचौर नगरपालिका २ थारमारे बस्ने ४० वर्षीया देवी डिसीको अवस्था गम्भीर छ। गम्भीर घाइतेलाई थप उपचारका लागि जिल्ला बाहिर पठाइएको छ।

त्यसैगरी तुलसीपुर १९ का विनोद चौधरी, शान्तिनगर गाउँपालिका २ अम्मुवाका ५० वर्षीय हिमलाल रामजाली, बुड्कवाकी १८ वर्षीया सुनिता चौधरी, मानपुरका ४० वर्षीय बोमराज सुनार, सल्यान ढोरचौर गाउँपालिका २ चाख्लीघाटकी ४५ वर्षीया नरभूमि बुढाथोकी घाइते भएका छन्। घाइतेको राप्ती अञ्चल अस्पताल तुलसीपुरमा उपचार भइराखेको इलाका प्रहरी प्रमुख शाहीले जानकारी दिए।

निर्वाचन विरोधी गतिविधि सञ्चालन गरिरहेको समूहबाट बम विस्फोट भएकोे प्रहरीको आशंका छ। मोटर साइकलमा आएका दुई जनाको समूहले बम विस्फोट गराएको खुलेको र उनीहरुले पहिचान समेत भइसकेको प्रहरीको भनाइ छ।

नेपाली कांग्रेसको चुनावी सभालाई लक्षित गरेर तुलसीपुरको तुलसी बोर्डिङ चौकमा बम विस्फोट भएको हो। बम विस्फोट भएको स्थान सभास्थल भन्दा करिब ५ सय मिटरको दूरीमा रहेका छ। बम विस्फोट भएपछि सभामा सहभागी र बाटोमा यात्रा गरिरहेका सर्वसाधारण त्रसित बनेका थिए।

प्रतिक्रिया दिनुहोस्

error: Content is protected !!